Óvíst um Hugo Ekitike

Hugo Ekitike gat ekki leikið á móti Fulham í gær þegar Liverpool og Fulham gerðu 2:2 jafntefli í London. Hann fann fyrir eymslum aftan í læri fyrir leikinn og var þess vegna ekki í leikmannahópnum. Óvíst er hvort Hugo getur leikið á móti Arsenal á fimmtudagskvöldið kemur. 

Mikið álag hefur verið á franska framherjanum frá því Alexander Isak fótbrotnaði á móti Tottenham í síðasta leik Liverpool fyrir jól. Cody Gakpo leiddi sókn Liverpool gegn Fulham. Cody var meiddur um skeið en er sem betur fer kominn aftur. Ekki veitir af. Hollendingurinn gerði vel í leiknum og skoraði.

Arne Slot, framkvæmdastjóri Liverpool, hefur lagt áherslu á að fara verði varlega með Hugo Ekitike. Hugo er markahæsti leikmaður Liverpool það sem af er leiktíðar með 11 mörk. Það er því betra að hann verði ekki lengi frá. Liverpool má ekki við því.