Pep Lijnders kominn með starf

Pep Lijnders nánasti aðstoðarmaður Jürgen Klopp hefur verið ráðinn í nýtt starf sem hann fer í eftir keppnistímabilið. Hann tekur við sem framkvæmdastjóri austurríska liðsins Red Bull Salzburg. Liðið hefur verið yfirburðalið í Austurríki síðasta áratuginn. Liðið hefur unnið deildina síðustu tíu árin og bikarkeppnina átta sinnum á því árabili. 

Pep kom til Liverpool, sem unglingaþjálfari, 2014 þegar Brendan Rodgers var framkvæmdastjóri. Hann fór ári seinna að vinna við þjálfun aðalliðsins. Pep hélt áfram hjá félaginu þegar Jürgen tók við af Brendan haustið 2015. 


Í byrjun ársins 2018 tók Pep við sem framkvæmdastjóri NEC Nijmegen sem þá var í næst efstu deild í heimalandi hans. Hann stoppaði stutt við þar og missti starf sitt hjá hollenska liðinu þá um sumarið og kom aftur til starfa hjá Liverpool. Hann varð þá nánasti aðstoðarmaður Jürgen Klopp og hefur verið við hlið Þjóðverjans þegar allir titlar á valdatíð hans unnust.


Portúgalinn Vitor Matos fer með Pep til Austurríkis. Hann hefur verið einn nánasti samstarfsmaður Jürgen frá því hann kom frá Porto haustið 2019. Þeir Vitor og Pep eru lengst til vinstri og hægri á myndinni að ofan.

Þegar Jürgen Klopp tilkynnti um brottför sína frá Liverpool var greint frá því að helstu aðstoðarmenn hans myndu fara. Þeir Pep og Vitor halda nú saman á braut.