Leikjatilfærslur

Búið er að tímasetja leiki Liverpool í jólamánuðinum. Hér er listi leikjanna með nýjum  tímasetningum. Gott að vita þetta ef verið að velta ferðalögum fyrir sér.

Fyrsti leikur Liverpool í jólamánuðinum verður annað kvöld þegar nýliðar Sunderland koma í heimsókn til Liverpool. Flautað verður til leiks á Anfield Road klukkan stundarfjórðung yfir átta.

Aðrir nýliðar verða mótherjar Liverpool í leik tvö í desember. Liverpool fer til Leeds á laugardaginn og mætir heimamönnum á Elland Road. Leikurinn hefst klukkan hálf sex.

Þriðjudaginn 9. desember verður haldið til Ítalíu þar sem Liverpool mætir Inter Milan. Leikar hefjast klukkan átta. 

Liverpool á því næst heimaleik laugardaginn 13. desember. Englandsmeistararnir fá Brighton and Hove Albion í heimsókn. Flautað verður til leiks á Anfield á hefðbundnum leiktíma eða klukkan þrjú.

Laugardaginn 20. desember fer Liverpool til London til að spila við Tottenham Hotspur. Leikurinn byrjar klukkan hálf sex. 

Síðasti leikur meistaraársins 2025 verður í Musterinu klukkan þrjú 27. desember. Gestir dagsins verða Wolverhampton Wanderes.

Allir leiktímar eru að íslenskum tíma. Á þessum árstíma er sami tími hér á Íslandi og  á Bretlandseyjum.