Lucas Leiva í banni

Brasilíumaðurinn Lucas Leiva verður fjarri góðu gamni á morgun þegar Liverpool mætir Norwich City. Hann tekur þá út leikbann sem hann fékk fyrir að hafa verið bókaður fimm sinnum á leiktíðinni. Lucas fékk gult spjald gegn Manchester United um síðustu helgi og það spjald kom honum í bann. Bannið er þó aðeins einn leikur. 

Lucas, sem var fyrirliði Liverpool gegn Rangers á þriðjudagskvöldið, hefur spilað vel á leiktíðinni þó svo að ekki hafi hann náð sér á strik gegn Manchester United. Ekki er gott að segja hver leysir Lucas af á morgun.

Jordan Henderson kom inn á fyrir Brasilíumanninn gegn United og spilaði mjög vel enda í sinni bestu stöðu. Jay Spearing kemur líka til álita en við sjáum til með hvað Kenny Dalglish telur réttast í stöðunni.