Stórsigur og öruggt áframhald!

Liverpool vann í kvöld 6:0 stórsigur á Qarabag í Meistaradeildinni á Anfield Road. Sigurinn tryggði öruggt áframhald fyrir Liverpool í 16 liða úrslit.  

Það var fátt um valkosti í miðvarðarstöðuna og reyndar liðinu öllu. Flestir reiknuðu með Wataru Endo í hjarta varnarinnar en Arne Slot valdi Ryan Gravenberch. Curtis Jones var veikur og því enn færri menn til taks. 

Liverpool tók strax öll völd gegn meisturum Aserbaísjan. Reyndar byrjaði leikurinn með ósköpum því á 4. mínútu þurfti Jeremie Frimpong að fara af velli eftir að hafa tognað. Wataru tók stöðu hans sem hægri bakvörður.

Fyrsta mark Liverpool kom eftir stundarfjórðung. Virgil van Dijk náði ekki almennilegum skalla við fjærstöngina eftir horn frá vinstri en boltinn fór til Alexis Mac Allister og hann skallaði í mark af örstuttu færi. Sex mínútum seinna tvöfaldaði Florian Wirtz forystu Englandsmeistarana. Hugo Ekitike sendi á Florian sem lék nær áður en hann skoraði af öryggi rétt við vítateiginn.Sannfærandi leikur og staðan hefði vel getað verið betri í hálfleik.

Eftir aðeins fimm mínútur í síðari hálfleik gerði Liverpool út um leikinn. Liverpool fékk aukaspyrnu utan við vítateiginn aðeins til vinstri. Dominik Szoboszlai sendi stutta hælsendingu á Mohamed Salah sem skaut boltanum yfir varnarveggin og óverjandi í markið. Frábært skot!

Sjö mínútum seinna sparkaði Virgil hátt og langt fram frá eigin vítateig. Varnarmaður gestanna misreiknaði sig. Hugo var á næstu grösum, hirti boltann, lék fram að vítateignum og skoraði með hnitmiðuðu skoti. Á 61. mínútu hrökk boltinn til Alexis í vítateignum. Hann lék á markmanninn við markteiginn og skoraði í autt markið!

Yfirburðir Liverpool voru algjörir og mark númer sex kom á lokamínútu leiksins. Virgil tók á skeið fram völlinn, skiptist á sendingum við Mohamed áður en hann sendi á varamanninn Federico Chiesa sem skoraði auðveldlega úr vítateignum. Stórsigur og öruggt áframhald tryggt!

Liverpool spilaði stórvel og vann stórsigur. Mótherjinn var vissulega ekki í hæsta gæðaflokki en sigurinn gefur Liverpool vonandi sjálfstaust svo liðið komist betur í gang í næstu leikjum!

Mörk Liverpool: Alexis Mac Allister (15. og 61. mín.), Florian Wirtz (21. mín.), Mohamed Salah (50. mín.), Hugo Ekitike (57. mín.) og Federico Chiesa (90. mín.).

Maður leiksins: Hugo Ekitike. Franski strákurinn heldur áfram að skora. Hann var ógnandi allan leikinn, skoraði og átti stoðsendingu. 

Áhorfendur á Anfield Road: 60.043.

Fróðleikur

- Þetta var í fyrsta sinn sem Liverpool hefur leikið gegn liði frá Aserbaísjan.

- Þetta var stærsti sigur leiktíðarinnar. 

- Alexis Mac Allister er kominn með þrjú mörk á leiktíðinni. 

- Florian Wirtz og Federico Chiesa eru búnir að skora fimm mörk á keppnistímabilinu.

- Mohamed Salah skoraði sjötta mark sitt á sparktíðinni. 

- Hugo Ekitike skoraði 13. markið á ferli sínum hjá Liverpool.   

- Virgil van Dijk varð fyrstur varnarmanna til að eiga þrjár stoðsendingar í Meistaradeildarleik. 

- Amara Nallo kom inn sem varamaður. Þetta var þriðji leikur hans með Liverpool og sá fyrsti sem hann fékk ekki rautt spjald.