Boudewijn Zenden er meiddur

Boudewijn Zenden gæti misst af úrslitaleiknum í Meistaradeildinni. Hann meiddist á ökkla á æfingu og það er alls óvíst að hann verði búinn að ná sér fyrir miðvikudaginn. Rafael Benítez hafði þetta að segja í dag.

"Bolo meiddist á ökkla á æfingu í gær. Hann er búinn að vera í meðferð hjá lækninum. Góðu fréttirnar eru þær að hann er ekki mjög bólginn. Við sjáum stöðuna betur eftir frekari skoðanir í dag. Það er erfitt að segja til um hvort hann verður orðinn leikfær fyrir úrslitaleikinn en ég útiloka það ekki enn. Hann er sterkur og ákveðinn og gæti verið fljótur að ná sér. Ég vona að hann verði í lagi."

Þetta er töluvert áfall því Hollendingurinn er einn besti valkosturinn sem Rafael Benítez hefur vinstra megin á miðjunni. Aðrir sem geta leyst þessa stöðu, og eru örvfættir, eru þeir Mark Gonzales og Harry Kewell. Hvorugur hefði líklega byrjað leikinn því Mark hefur ekki leikið vel síðustu vikurnar og Harry er ekki í nógu góðri leikæfingu til að spila heilan leik. Eins væri hægt að láta John Arne Riise spila á kantinum en þá þyrfti að láta einhvern réttfættan spila stöðu vinstri bakvarðar. Við sjáum þó hvað setur.