Peter Crouch líklega með gegn Arsenal

Rafa Benítez býst við því að Peter Crouch verði tilbúinn í slaginn gegn Arsenal um næstu helgi.  Crouch gekkst undir nefaðgerð fyrir skemmstu og hefur jafnað sig hratt og vel.

Talið var að Crouch myndi ekki geta spilað aftur fyrr en í fyrsta lagi gegn PSV í fyrri leik 8-liða úrslita Meistaradeildarinnar en bati hans eftir aðgerðina hefur verið mun hraðari en búist var við í fyrstu.

Benítez hafði þetta að segja um sóknarmanninn:  ,,Hann er farinn að æfa með bolta en við pössum uppá að hann sé ekki að lenda í neinum líkamlegum snertingum því það er alltaf hætta á því að hann fái á sig högg."

,,Ég held að hann verði í lagi í næstu viku, en við verðum að sjá hversu hratt nef hans grær.  Við búumst ekki við því að þetta verði vandamál."

Meiðsli Crouch komu í raun ekki á slæmum tíma því nú er landsleikjahlé og þar sem hann var ekki valinn í landsliðið vegna meiðslanna nær hann að hvílast og jafna sig almennilega.  Hann ætti því að vera vel undirbúinn undir lokaátökin á þessu keppnistímabili og ekki veitir af.