Antonio Barragan skorar sigurmark fyrir varaliðið

Varalið Liverpool sigraði varalið West Brom Albion 1-0 á útivelli í gærkvöldi. Spánverjinn Antonio Barragan skoraði sigurmark Liverpool snemma í seinni hálfleik. Þetta var fyrsti sigur varaliðsins á leiktíðinni í þremur leikjum.

Leikurinn var jafn til að byrja með. Bæði lið fengu nokkur færi. En það var Liverpool sem komst yfir á 51. mínútu. Florent Sinama Pongolle sendi út á vinstri kantinn á Danny Gutrie. Skot hans var varið en Antonio Barragan var fyrstur að átta sig, náði frákastinu og skoraði. Hann lék á hægri kantinum í leiknum og átti góðan leik. Þetta reyndist eina mark leiksins.

Peter Crouch sneri aftur til leiks eftir meiðsli. Hann lék síðasta hálftímann í leiknum og þótti standa sig vel. Fyrir utan hann og Antonio voru þeir Florent Sinama-Pongolle og David Raven þeir einu í liði gærkvöldsins sem eitthvað hafa spilað með aðalliðinu. Austurríksimaðurinn Besian Idrizaj lék sinn fyrsta leik með Liverpool þegar hann skipti við Florent.

Lið Liverpool var þannig skipað: Willis, Raven, Smith, Roque, O'Donnell, Peltier, Barragan, Hobbs (Mannix 79. mín.), Sinama-Pongolle (Idrizaj 60. mín.), Calliste (Crouch 63. mín.) og  Guthrie. Ónotaðir varamenn: Roberts og Antwi.

Maður leiksins samkvæmt Liverpoolfc.tv: Danny O´Donnell. Miðvörðurinn sem kom til Liverpool úr áhugamannadeild átti mjög góðan leik.