Fánadagur á sunnudaginn

Eins og fram kom í fréttum hjá okkur í gær, þá verður haldinn Fánadagur á Champions Café á sunnudaginn þegar Liverpool fær lið Chelsea í heimsókn. Það verður mikið um dýrðir og margt að gerast.

Fyrir stuttu gerðu Champions Café og Liverpool klúbburinn á Íslandi samkomulag, sem gerir það að verkum að rekstur www.liverpool.is er tryggður næsta árið. Þetta samkomulag hefur gríðarlega mikla þýðingu fyrir klúbbinn og hluti af því var að halda sannkallaða Liverpool hátíð tvisvar á þessu tímabili. Nú er komið að því, og ætlum við að halda Fánadag á sunnudaginn.

Það verður mikið og margt að gerast, eins og ávallt þar sem Liverpool stuðningsmenn koma saman. Í þetta skiptið verður það bara enn meira. Tveir leikir verða í gangi, þar sem vegleg verðlaun verða í boði. Sá fyrri er aðeins fyrir þá sem greitt hafa félagsgjöldin í klúbbinn fyrir þetta tímabil og verður það létt getraun með þrem spurningum. Það verður dregið úr réttum svörum og mun sá heppni hljóta nýja varabúning Liverpool, sem Reebok umboðið gefur.

Seinni leikurinn gengur út á það að tippa á rétt úrslit í leiknum. Þetta er Carlsberg leikur og kostar miðinn 200 kr. Menn geta keypt sér eins marga miða og menn vilja, en í aðalvinning verður nýja æfingatreyja Liverpool. Fjölmargir aukavinningar verða einnig í boði.

Eins og á öllum Fánadögum, þá eru menn hvattir til að fara að fordæmi stuðningsmannanna á Anfield, og skarta sínu skærasta. Þá er verið að tala um búninga, trefla, fána, húfur og allt sem viðkemur Liverpool. Veitt verða verðlaun fyrir flottasta útbúnaðinn.

Champions Café mun hafa sérstök tilboð í tilefni dagsins. Champions borgari ásamt léttum drykk, á aðeins 990 kr. Einnig verður guli vökvinn á sérstöku Liverpool verði, eða kr. 400 1/2 lítri.

Jói Útherji kemur til með að verða með lítið útibú á svæðinu, þar sem menn geta keypt nýju treyjurnar, trefla, klukkur og annað. Eingöngu verður hægt að taka við beinhörðum peningum í því.

Leikurinn sjálfur hefst klukkan 15:00, en við viljum eindregið hvetja menn til að mæta snemma á svæðið. Stjórn klúbbsins verður á svæðinu til að kynna klúbbinn og eins munu helstu stuðningsaðilar klúbbsins mæta á svæðið, þ.e.a.s. þeir sem mögulega komast.

Við viljum að sjálfsögðu hvetja ALLA stuðningsmenn til að mæta á svæðið. Við bjóðum kvenkyns stuðningsmenn sérstaklega velkomna og eins viljum við hvetja foreldra til þess að taka krakkana með sér og gera þetta að allsherjar hátíð.

Hægt verður að skrá sig í klúbbinn á staðnum og ganga frá greiðslu.

Mætum nú sem flest og troðfyllum staðinn. Það er alltaf stemmning þar sem Púllarar koma saman, en gerum hana núna ennþá meiri og eftirminnilegri.

Svo toppar þetta væntanlega allt þegar liðið okkar skilar góðum sigri á Eið Smára og félögum hans í Chelsea.

Áfram Liverpool