Andoni Iraola talinn líklegur arftaki Arne Slot!

Flestir fjölmiðlamenn telja Spánverjann Andoni Iraola líklegastan sem arftaka Arne Slot. Andoni var framkvæmdastjóri Bournemouth þrjú síðustu keppnistímabil en hætti þar í lok leiktíðarinnar. Hann tók við Kirsuberjastrákunum 2023 og byggði upp mjög gott lið.

Andoni hóf þjálfaraferilinn 2018 þegar hann þjálfaði AEK Larnaca á Kýpur. Hann vann stórbikar Kýpur með liðinu. Eftir eitt keppnistímabil fór hann til Spánar þar sem hann þjálfaði Mirandés í eina leiktíð. Andoni tók svo við Rayo Vallecano sumarið 2020 og þjálfaði liðið í þrjú keppnistímabil þar til hann tók við Bournemouth. Hann skildi við liðið eftir að hafa komið því í Evrópudeildina eftir að hafa náð sjötta sæti í Úrvalsdeildinni. 

Andoni tók sér stutt frí eftir að hann hætti hjá Bournemouth. Hermt var að hann hefði þá átt í viðræðum við AC Milan. Næst fréttist að hann hefði hætt viðræðum við AC Milan því forráðamenn Liverpool hefðu sett sig í samband við hann. 

Hvernig sem það var þá er Andoni Iraola nú talinn langlíklegastur til að verða næsti framkvæmdastjóri Liverpool. Tveir aðrir hafa aðeins verið nefndir. Það eru þeir Sebastian Hoeness sem þjálfar Stuttgart í Þýskalandi og Pierre Sage sem þjálfar franska liðið Lens. 

Í dag telja fjölmiðlamenn sig hafa heimildir fyrir því að forráðamenn Liverpool muni hefja formlegar viðræður við Andoni hvern næsta dag. Richard Hughes, íþróttastjóri Liverpool, þekkir Andoni mjög vel en þeir unnu saman hjá Bouremouth. Það ætti fátt að koma í veg fyrir að þeir nái saman um að Andoni taki við af Arne Slot.