Landsleikjafréttir

Mars landsleikjahrotan er að baki. Hér er allt sem snertir Liverpool úr seinni hluta hrotunnar.  Á mánudagskvöldið var leikið í forkeppni heimsmeistarakepnninnar. Úrslitakeppni HM 2026 fer fram í Bandaríkjunum, Kanada og Mexíkó. 

England vann Lettland 3:0 á Wembley. Curtis Jones kom inn á sem varamaður. Jarell Quansah var á bekknum. 

Wales gerði 1:1 jafntefli í Norður Makedóníu. Lewis Koumas var varamaður. 

Í Afríkuundankeppninni lék Egyptaland við Síerra Leóne í Kaíró á þriðjudaginn. Mohamed Salah lék með heimamönnum sem unnu 1:0.

Í Asíuforkeppninni gerðu Japan og Sádi-Arabía gerðu markalaust jafntefli. Wataru Endo var á miðjunni hjá Japan. Ef rétt er skilið er Japan komið með farseðil á HM. 

Í forkeppni Suður Ameríku lék Úrúgvæ í Bólivíu. Liðin skildu án marka. Darwin Núnez lék seinni hálfleikinn. 

Heimsmeistarar Argentínu unnu öruggan 4:1 sigur á Brasilíu. Alexis Mac Allister lék mjög vel og skoraði þriðja mark Argentínu. Það mun hafa verið fjórða landsliðsmark hans. Argentína er komið áfram á HM. 

Luis Díaz skoraði strax á fyrstu mínútu þegar Kólumbía fékk Paragvæ í heimsókna. Leiknum lauk 2:2. Luis, sem þótti bestur á vellinum, skoraði í báðum landsleikjunum. Það lofar vonandi góðu fyrir Liverpool.