Dregið í Deildarbikarnum

Búið er að draga til átta liða úrslita Deildarbikarsins. Þriðju umferðina í röð fær Liverpool leik við lið úr efstu deild. Aðra umferðina í röð þarf Liverpool að leika við lið á suðurströndinni. 

Liverpool mætir Southampton á St Mary´s í átta liða úrslitum. Liðin leiða saman hesta sína upp úr miðjum desember. 

Liverpool sló Brighton úr leik í kvöld með því að vinna 2:3 á suðurströndinni. Southampton tryggði sér sæti í átta liða úrslitum í gærkvöldi með því að vinna 3:2 heimasigur á Stoke City.

Eins og allir stuðningsmenn Liverpool vita hefur Liverpool titil að verja. Liðið vann Deildarbikarinn í tíunda sinn á síðasta keppnistímabili.