Æfingaleik bætt við

Búið er að bæta nýjum æfingaleik við dagskrá Liverpool á undirbúningstímabilinu. Sá fer fram á Anfield Road í Liverpool sunnudaginn 11. ágúst. Mótherjinn verður spænska liðið Sevilla. Mörg undanfarin ár hefur Liverpool spilað síðasta æfingaleikinn fyrir komandi leiktíð heima á Anfield. 

Áður voru komnir þrír æfingaleikir á dagskrá. Sá fyrsti fer fram 26. júlí í Pittsburgh. Mótherjinn verður Real Betis frá Spáni. Annar leikurinn verður leikinn í Philadelphia 31. júlí og mætir Liverpool þá Arsenal. Síðasti leikurinn í Bandaríkjaferðinni verður á móti Manchester United. Liðin mætast í Suður Kaliforníu 3. ágúst.