Enginn bilbugur á Mohamed!

Ekki er ósennilegt að einhverjar breytingar verði á leikmannahópi Liverpool eftir að Jürgen Klopp heldur á braut. Sumir hafa talið að Mohamed Salah fari en svo virðist ekki vera. Hann sendi þessi orð frá sér á samfélagsmiðlum stuttu eftir síðasta leik leiktíðarinnar.  

,,Við gerum okkur grein fyrir því að titlar telja. Þess vegna munum við gera allt sem í okkar valdi stendur til að við náum að vinna titla á næsta keppnistímabili. Stuðningsmenn okkar verðskulda titla og við munum berjast eins og ljón til að ná markmiðum okkar!"


Það er sem sagt enginn bilbugur á Mohamed Salah. Hann virðist staðráðinn í að halda áfram að spila með Liverpool og reyna að vinna fleiri titla. 

Mohamed skoraði 25 mörk á sparktíðinni. Það var býsna gott miðað við að hann missti af rúmlega tveimur mánuðum vegna meiðsla.