Curtis búinn að ná sér

Curtis Jones er loksins búinn að ná sér eftir meiðsli. Hann gæti verið í liðshópi Liverpool á morgun þegar liðið mætir Sheffield United á Anfield Road. 


Curtis spilaði síðast upp úr miðjum febrúar þegar Liverpool vann Brentford 1:4 í London. Það var 28. leikur hans á leiktíðinni sem er hans besta frá því hann spilaði fyrst í aðalliði Liverpool. Hann var búinn að skora fimm mörk og leggja upp þrjú. 

Vonandi nær Curtis Jones sér á strik það sem eftir er leiktíðarinnar. Það munar mikið um hann eins og hann var að spila. Í raun er hann búinn að vera einn besti miðjumaður Liverpool á þessu keppnistímabili.

Fréttir af bata Curtis komu fram á blaðamannafundi Jürgen Klopp í dag. Hann nefndi á fundinum að þeir Trent-Alexander Arnold og Diogo Jota geti hugsanlega farið að æfa eftir viku eða svo. Vonandi reynist það rétt því þeir eru búnir að vera lengi frá.