Enginn hundur í mönnum!

Það mun ekki vera neinn hundur í mönnum varðandi tilvonandi félagaskipti Fabinho Tavarez. Al Ittihad frá Sádi Arabíu ætlar sér að fá Brasilíumanninn í sínar raðir. Eftir því sem talið er þá hefur félagið boðið Liverpool 40 milljónir sterlingspunda. 


Fyrir viku eða svo var talið að félagaskiptin myndu verða staðfest hvern næsta dag en hingað til hefur ekki verið gengið frá þeim. Fyrir nokkrum dögum kom upp kvittur þess efnis að allt væri í uppnámi vegna þess að hundum sem fjölskylda Fabinho á yrði ekki hleypt inn í Sádi Arabíu. Þetta hefur verið borið til baka og það ætti ekki að vera hundur í neinum.

Ljóst er að það er hið versta mál að missa Fabinho frá Liverpool. En eins og með aðra þá leikmenn sem hafa tekið stefnuna til Sádi Arabíu lítur út fyrir að erfitt sé að hafna tilboðum félaga þaðan!