Suarez getur endurtekið leikinn

Í mars síðast liðnum lék Luis Suarez leikmenn Manchester United hvað eftir annað upp úr skónum. Kenny Dalglish segir að hann geti auðveldlega endurtekið leikinn í dag.

Luis Suarez lagði öðrum fremur grunninn að 3-1 sigri Liverpool á Manchester United á Anfield á síðustu leiktíð. Hápunktur leiksins var án efa einleiksatriði hans áður en Dirk Kuyt skoraði fyrsta mark leiksins.

,,Ég hef enga hugmynd um hvernig í ósköpunum hann fór að þessu", segir Dalglish. ,,Ég hef séð hann gera allar þessar fintur áður, en þarna gerði hann þær allar í röð og prjónaði sig í gegnum 3-4 menn á pínulitlu svæði. Þetta var algerlega ótrúlegt."

,,En Luis er ekki bara töframaður með boltann. Hann hefur svo margt annað fram að færa. Það er gríðarlegur styrkur fyrir okkur að hafa hann innan okkar raða."

Aðspurður hvort hann haldi að varnarmenn Manchester liðsins hræðist Suarez svarar Dalglish:

,,Hvort þeir eru hræddir við hann? Það er þeirra mál. Ég hef ekki hugmynd um hvað þeir eru að hugsa, en ég er viss um að þeir muna hvernig hann fór með þá. Þeir vita hvers hann er megnugur og það er þeirra vandamál."

,,Luis gerir eitthvað nýtt í hvert einasta skipti. Vandamálið sem mótherjarnir standa frammi fyrir þegar þeir mæta honum er að þeir geta ekki ímyndað sér hvað honum dettur í hug að gera næst. Hann gerir það óvænta og það er mikill kostur fyrir okkur. Vonandi heldur hann áfram að koma þægilega á óvart."

Suarez hefur skorað fimm mörk fyrir Liverpool á yfirstandandi leiktíð og hefur þar að auki komið við sögu í flestum öðrum mörkum liðsins.

,,Þetta er akkurat það sem Suarez snýst um. Hann leggur alltaf sitt af mörkum. Hann er alltaf hættulegur. Svo er hann líka mjög sterkur liðsmaður. Hann gefst aldrei upp og drífur félaga sína með sér. Hann small inn í hópinn á fyrsta degi og hann virðist njóta hverrar mínútu hérna með okkur. Hann er frábær karakter."

,,Karaktereinkennin skapa persónuna og persónan skapar fótboltamanninn. Ef karakterinn er ekki í lagi þá er fótboltamaðurinn ekki heldur í lagi. Þú ert það sem þú ert og því verður ekki breytt. Luis er heilsteyptur karakter."

,,Ég get sagt með nokkurri vissu að allir leikmennirnir sem við höfum keypt vilja standa sig og ná betri árangri. Það er það sem lífið snýst um hjá okkur. Hópurinn er góður og ég held að það sé ekki einn einasti maður í hópnum sem er ekki til í að leggja mikið á sig til þess að verða betri."