Yossi og Javier klárir

Rafa Benítez þarf ekki að glíma við nein einustu meiðslavandræði fyrir leikinn við PSV Eindhoven á miðvikudagskvöldið en þeir Javier Mascherano og Yossi Benayoun eru búnir að ná sér af meiðslum sínum.

Þeir félagar voru ekki með um helgina í góðum sigri á Everton og sagði Rafa Benítez þetta í viðtali á æfingasvæðinu í morgun.

,,Báðir leikmennirnir æfðu í morgun og eru klárir.  Við munum taka aðra æfingu í fyrramálið en eins og er þá er enginn leikmaður meiddur."

Javier Mascherano er æstur í að komast aftur út á völlinn.  ,,Ég er orðinn góður eftir að hafa hvílt í viku eða meira," sagði hann í viðtali.  ,,Ég var auðvitað vonsvikinn yfir því að hafa misst af nágrannaslagnum en sem betur fer stóðu liðsfélagar mínir sig vel og við erum á toppnum í deildinni.  Nú er ég klár fyrir PSV leikinn.  Ég er í hópnum og það er undir stjóranum komið hvort ég spila."