Andriy fær verðskuldað hrós

Úkraínumaðurinn Andriy Voronin var hetja Liverpool í dag þegar hann skoraði sigurmarkið gegn Toulouse í forkeppni Meistaradeildarinnar.

Markið var heldur ekki neitt slor. Andriy skoraði með bylmingsskoti, upp í markhornið, af um 25 metra færi eftir að hafa lagt boltann laglega fyrir sig. Það var því ekki að undra að hann fengi hól eftir leikinn. Rafael Benítez fór þar fremstur í flokki.

"Andriy skoraði stórglæsilegt mark. Hann er mjög góður sóknarmaður og markið sýndi hversu góður hann er. Hann er slunginn, hefur góðan leikskilning og veitir okkur marga valkosti í sóknarleiknum. Hann getur spilað fyrir aftan fremsta mann, leitt sóknina sjálfur eða ógnað frá köntunum. Svo getur hann auðvitað líka skorað frábær mörk eins þetta."

Andriy fékk líka verðskuldað hól frá Jamie Carragher. "Andriy skoraði frábært marki og hann á virkilegt hrós skilið því aðrir hafa ekki gert betur en hann það sem af er sumars. Ég var beint fyrir aftan hann um leið og hann skaut. Ég sá um leið að þetta skot færi í markið."