Í hnotskurn

Sæti í undanúrslitum Meistaradeildarinnar endanlega innsiglað. Enn skorar Pétur mikli í Evrópukeppninni. Þetta er leikur Liverpool og PSV Eindhoven í hnotskurn.

- Liverpool og PSV Eindhoven léku í fjórða sinn á leiktíðinni.

- Alls lék PSV sex leiki gegn enskum liðum á þessari leiktíð. Fyrir utan leikina fjóra gegn Liverpool þá spilaði liðið tvisvar við Arsenal í sextán liða úrslitum Meistaradeildarinnar.

- Þetta var í nítjánda sinn sem Liverpool leikur í átta liða úrslitum Evrópukeppni.

- Liverpool hefur aldrei fallið úr leik í Evrópukeppni eftir að hafa unnið fyrri leik á útivelli. Það varð sem betur fer ekki nein breyting á því.

- PSV hefur ekki vegnað vel upp á síðkastið og þetta var sjöundi leikur þeirra í röð án sigurs.

- Boudewijn Zenden lék gegn sínu gamla félagi. Hann varð hér á árum áður hollenskur meistari með PSV Eindhoven.

- Jan Kromkamp missti af því að leika gegn gamla liðinu sínu í fjórða sinn á leiktíðinni. Hann var heima í Hollandi vegna meiðsla.

- Peter Crouch skoraði átjánda mark sitt á leiktíðinni.

- Þetta var sjöunda markið sem Peter skorar í Meistaradeildinni á leiktíðinni. Aðeins Kaka, leikmaður AC Milan, hefur skorað jafn mörg mörk í keppninni á þessari leiktíð.

- Leikmenn PSV eru líklega búnir að fá nóg af Peter Crouch því þetta var þriðja mark hans gegn liðinu!

- Markið sem Peter Crouch skoraði var 4000. markið sem skorað er í Meistaradeildinni frá því hún var stofnsett.

- Liverpool er þar með komið í undanúrslit Meistaradeildarinnar í annað sinn á þremur árum. Líkt og 2005 þá stendur Chelsea í veginum!

Jákvætt:-) Liverpool tryggði sæti sitt í undanúrslitum Meistaradeildarinnar. Þar er liðið okkar í annað sinn í þremur árum! Liverpool hafði öll völd á vellinum og gaf PSV ekki nein færi á sér. Peter Crouch hélt áfram að skora!

Neikvætt:-( Meiðsli Craig Bellamy voru það eina sem skyggði á sigurinn. Kannski hefðu leikmenn Liverpool þó mátt herja aðeins meira á hollensku meistarana.

Þrír bestu leikmenn Liverpool samkvæmt Liverpoolfc.tv:

1. Jermaine Pennant. Hann var líflegur og reyndi alltaf að herja á vörn PSV og koma henni í vanda. 

2. Xabi Alonso. Spilaði boltanum vel og stjórnaði öllu á miðjunni.

3. Sami Hyypia. Hann var sem klettur í vörninni og var góð fyrirmynd eins og alltaf.