Antonio Barragan stendur fyrir sínu

Antonio Barragan skoraði sigurmark Deportivo La Coruna um helgina. Deportivo vann þá 1:0 sigur á Getafe. Liverpool seldi Antonio til Deportivo á liðinu sumri en mun samt enn eiga tímabundinn forkaupsrétt á honum. Antonio er búinn að standa sig vel á leiktíðinni og hefur leikið með spænska undir 21. árs liðinu. Alls hefur Antonio leikið fjórtán leiki á leiktíðinni og skorað tvö mörk. Það er spurning hvort góð frammistaða hans veldur því að Liverpool eigi eftir að fá hann aftur í liðs við sig.

Antonio Barragan lék einn leik með aðalliði Liverpool á því eina ári sem hann dvaldi á Englandi.