Sá fyrsti farinn

Um áramótin opnaðist fyrir leikmannaskipti og það verður hægt að skipta um félög út þennan fyrsta mánuð ársins. Sá fyrsti til að yfirgefa Liverpool er farinn á braut. Hér er um að ræða varnarmanninn unga James Smith sem hefur gengið til liðs við Ross County. James verður í láni hjá skoska félaginu út leiktíðina. Ross County er í fyrstu deild skosku knattspyrnunnar.

James er alinn upp hjá Liverpool. Hann lék sinn fyrsta og hingað til eina leik með aðalliðinu þegar Liverpool vann Reading 4:3 í Deildarbikarnum í lok október. Hann kom þá inn sem varamaður fyrir Lee Peltier og lék síðasta stundarfjórðunginn. James þykir efnilegur og fékk tveggja ára samning við Liverpool síðasta sumar. Hvað sem síðar verður þá mun James alltaf geta sagt að hann hafi þó leikið einn leik með Liverpool og það sigurleik!