Í mörg horn að líta

Það var í mörg horn að líta hjá hinum unga og efnilega Stephen Darby núna í vikunni. Hann var í fyrsta sinn valinn í aðalliðshóp Liverpool og fór með honum til Istanbúl. Hann fékk sæti á varamannabekk Liverpool í leiknum gegn Galatasaray en kom ekki við sögu. Liðsmenn Liverpool sneru heim til Englands á miðvikudaginn og Stephen þurfti að vera snar í snúningum því hann átti að spila með unglingaliðinu í Unglingabikarkeppninni þá um kvöldið. Hann þótti standa sig mjög vel þegar Liverpool hóf vörn sína á Unglingabikarnum með 2:1 útisigri á W.B.A.

Steve Heighway, þjálfari unglingaliðsins, hældi Stephen mjög eftir leikinn við W.B.A. "Stephen kom ekki frá Istanbúl fyrr en síðdegis á miðvikudaginn eftir að hafa verið þar með aðalliðinu. Það var frábært að fá hann til að spila með okkur í Unglingabikarkeppninni eftir að hann var búinn að ferðast 3.000 mílur. Stephen hefur alveg magnaðan persónuleika"

Stephen var fyrirliði ungligaliðsins á síðustu leiktíð þegar það vann Unglingabikarkeppnina. Stephen þykir efnilegur varnarmaður og sumir telja að hann geti átt framtíð fyrir sér í atvinnuknattspyrnu en það er annað mál hvort það verður hjá Liverpool. Hann hefur að minnsta kosti stigið mikilvægt skref með því að vera valinn í aðalliðshópinn í fyrsta sinn.