Liverpool og Man. Utd. með sameiginlega yfirlýsingu

Forsvarsmenn Liverpool og Man. Utd. hafa gefið út sameiginlega yfirlýsingu vegna atviks á laugardaginn þegar ráðist var að sjúkrabíl með Alan Smith, leikmann Man. Utd.,  innanborðs eftir leik liðanna á laugardag.

Alan Smith var á leið á sjúkrahús eftir að hafa meiðst hryllilega í leiknum en einhverjir sem kalla sig stuðningsmenn gátu ekki látið sjúkrabílinn í friði heldur réðust til atlögu þegar hann var á leið frá Anfield. Þetta hafði þó ekki áhrif á för sjúkrabílsins.

Í yfirlýsingunni segir: "Þetta fólk er ekki raunverulegir aðdáendur knattspyrnu. Bæði félögin eru þeirrar skoðunar að heimskulegar gjörðir nokkurra vitleysinga eigi ekki að skyggja á störf þeirra sem þátt tóku í að tryggja að Alan fengi bestu mögulegu meðferð eins fjótt og hægt er.

Manchester United vill einnig benda á að félagið er afar þakklátt fyrir snögga og góða hjálp frá öllu starfsfólki Liverpool."