Stjórinn hrósar hinum stöðuga Finnan

Rafael Benitez hrósaði í dag stöðuleika Steve Finnan og undirstrikaði mikilvægi hans í Liverpool liðinu.

Finnan skilaði enn einni flekklausri frammistöðunni á laugardaginn í 1-0 sigurleiknum gegn Tottenham og Benitez telur að koma Hollendingsins Jan Kromkamp muni verða til þess að landsliðsmaðurinn írski spili enn betur.

,,Finnan er leikmaður sem spilar stöðugt vel," sagði Benitez.

,,Hann spilar uppá sjö, átta, níu eða jafnvel tíu í hverri viku sem er mjög mikilvægt fyrir liðið. Sumir leikmenn spila vel í ákveðnum leikjum en detta svo niður í öðrum. Finnan spilar vel allt tímabilið."

,,Aukin samkeppni frá Jan Kromkamp mun einnig vera góð fyrir hann og liðið og mun hjálpa honum að halda stöðuleikanum."