Bara stuðningsmenn Liverpool!

Liverpool þarf á öllu sínu að halda annað kvöld þegar Galatasaray kemur í heimsókn. Í fyrsta sinn í sögunni verða bara stuðningsmenn Liverpool á leik á Anfield Road!

Vegna slæmrar hegðunar stuðningsmanna Galatasaray fyrr á leiktíðinni í Meistaradeildinni fékk félagið bann og sekt. Bannið felur í sér að stuðningsmönnum félagsins er óheimilt að fá miða á leikinn við Liverpool annað kvöld. Bannið kemur auðvitað ekki í veg fyrir að einhverjir stuðningsmenn Galatasary fari til Liverpool og einhverjir munu örugglega næla sér í miða. En í áhorfendastæðum gestanna verða engir gestir heldur bara stuðningsmenn Liverpool. Það hefur ekki gerst áður!

Liverpool þarf á öllu sínu að halda til að slá tyrkneska liðið úr keppni þeirra bestu í Evrópu. Það ætti að hjálpa til að hafa bara stuðningsmenn Liverpool í Musterinu!