Allt eða ekkert!

Það verður allt eða ekkert á Anfield Road í kvöld. Liverpool og Galatasaray leika upp á sæti í átta liða úrslitum Meistaradeildarinnar. 

Galatasaray vann fyrri leik liðanna í 16 liða úrslitunum 1:0 í síðustu viku. Það þýðir að Liverpool þarf að snúa dæminu við með því að vinna í kvöld. Nú eru útimörk ekki lengur í gildi þannig að allir sigrar Liverpool með tveimur mörkum duga. Svo dugar eins marks sigur alltaf til framlengingar og vítaspyrnukeppni ef með þarf. 

Ljóst er að Liverpool þarf að spila einn sinn besta leik á leiktíðinni. Liðið hefur auðvitað tapað tvívegis á móti tyrkneska liðinu það sem af er leiktíðar. Segja má að það geti varla verið að Liverpool tapi þrísvar í röð fyrir liðinu. En til að breyta því þurfa leimennn Liverpool að sýna sitt rétta andlit. Með stuðningi troðfulls leikvangs af stuðningsmönnum Liverpool hlýtur það að takast. Allt er þegar þrennt er!