Stórleikur í Manchester!

Það verður stórleikur í Manchester um hádegisbilið á morgun. Liverpool tekur hús á nýkrýndum Deildarbikarmeisturum Manchester City. Ef Liverpool á að takast að vinna FA bikarinn þarf að vinna City á útivelli og það er ekkert áhlaupaverk. 

Til að vinna Manchester City þurfa lið á öllum sínum bestu mönnum að halda. Ekki er það svo gott að svo sé hjá Liverpool. Alisson Becker verður ekki með. Hann missti af síðasta leik, á móti Brighton, fyrir landsleikjahlé. Reiknað er með að hann komi til baka úr meiðslum fyrir lok leiktíðar en hann verður frá næstu vikur.

Mohamed Salah missti líka af síðasta leik. En sem betur fer verður hann tilbúinn í slaginn á morgun.

Federico Chiesa var valinn í ítalska landliðið en gat svo ekki verið með því. Hann er orðinn leikfær á nýjan leik. 

Jeremie Frimpong fór af velli í landsleik með Hollandi og virtist enn á ný vera orðinn meiddur. Hann æfði þó með Liverpool í dag og ætti að vera tiltækur.

Bestu fréttirnar af meiðslum eru að Alexander Isak er farinn að æfa. Ekki er loku fyrir það skotið að Svíinn verði í leikmannahópi Liverpool í Manchester. 

Leikið verður til þrautar í Manchester á morgun. Ef með þarf verður framlengt og gripið til vítaspyrnukeppni.