| Sf. Gutt

Lengi getur vont versnað!

Match programme

Lengi getur vont versnað! Liverpool fékk 1:4 skell á Anfield Road fyrir PSV Eindhoven. Ótrúlegt miðað við að Liverpool var lengi vel betra liðið.

Strax á fyrstu mínútunum fór allt í vitleysu. Eftir hornspyrnu sló Virgil van Dijk boltann með uppréttri hendi. Óskiljanlegt! Dómarinn gat ekki annað en dæmt víti. Ivan Perisic tók vítið og skoraði af öryggi framhjá Giorgi Mamardashvili sem var í markinu vegna veikinda Alisson Becker. Sex mínútur búnar og Liverpool undir. Liverpool svaraði þessu reyndar vel tíu mínútum seinna. Cody Gakpo komst inn í vítateiginn vinstra megin og átti fast skot. Markmaður PSV varði en hélt ekki boltanum. Dominik Szoboszlai hirti frákastið og skoraði frá vítapunktinum. Allt jafnt!

Fjórum mínútum seinna var Hugo Ekitike augljóslega felldur í vítateignum en ekkert var dæmt. Ótrúlegt! Liverpool réði nú lögum og lofum. Á 28. mínútu átti Cody sendingu fyrir markið á Mohamed Salah en varnarmaður bjargaði á síðustu stundu. Enn hélt Liverpool áfram að sækja og Virgil átti skalla eftir horn en boltinn fór í þverslána. Áfram sótti Liverpool og Hugo komst í skotfæri en markmaðurinn varði fast skot Frakkans. Mjög góður leikkafli Liverpool og liðið átti að vera yfir í hálfleik en staðan var jöfn í hléi. 

En eftir 11 mínútur í síðari hálfleik fór allt í vitleysu. Guus Til fékk þá sendingu inn í vítateiginn eftir hraða sókn og skoraði laglega framhjá Giorgi. Milos Kerkez var illa á verði og hefði átt að gæta Guus betur. Ungverski bakvörðurinn hefur alls ekki fundið sig eftir að hann kom til Liverpool. 

Liverpool lagði ekki árar í bát og á 65. mínútu átti Dominik fast skot sem var varið. Markmaðurinn hélt ekki boltanum og Cody skallaði frákastið yfir úr góðu færi. Á 74. mínútu hitti Ibrahima Konaté ekki boltann rétt fyrir innan miðjuna á eigin vallarhelmingi. Varamaðurinn Ricardo Pepi slapp inn í vítateiginn og átti skot í stöng. Annar varamaður Couhaib Driouech hirti frákastið og skoraði. Enn og aftur gerði Ibrahima mistök. Hann hefur verið óravegu frá sínu besta á leiktíðinni. Ótrúlegt að PSV væri komið í 1:3.

Leikur Liverpool var nú i molum. Leikmenn hengdu haus og í viðbótartíma kom fjórða mark gestanna. Eftir hraða sókn smellti Couhaib boltanum í markið úr vítateignum. Hrikaleg niðurstaða!

Liverpool spilaði lengi býsna vel en þegar á móti blæs gengur fátt upp. Svo var þetta kvöld. Liverpool hefur nú tapað níu af síðustu 12 leikjum. Það er auðvitað óásættanlegt í alla staði!

Mark Liverpool: Dominik Szoboszlai (16. mín.).

Mörk PSV Eindhoven: Ivan Perisic, víti, (6. mín.), Guus Til (56. mín) og Couhaib Driouech (74. og 90. mín.) 

Maður leiksins: Cody Gakpo. Hollendingurinn var mjög sprækur á móti gamla liðinu sínu. 

Áhorfendur á Anfield Road: 59.949. 

Fróðleikur

-  Frá því Liverpool tapaði fyrsta leik sínum á leiktíðinni 27. september 2:1 fyrir Crystal Palace hefur liðið, með þeim leik, spilað 12 leiki í öllum keppnum. Liverpool hefur tapað níu af þessum 12 leikjum. Liverpool tapaði síðast níu leikjum af 12 frá nóvember og fram í desember á keppnistímabilinu 1953/54.  Liðið féll í aðra deild á þeirri leiktíð. 

- Dominik Szoboszlai skoraði í þriðja sinn á leiktíðinni. 

- Aðra leiktíðina í röð tapar Liverpool Evrópuleik á Anfield. Liðið tapaði 0:1 fyrir PSG Germain á síðustu leiktíð. 

- Áhorfendur á leiknum voru 59.949. Fleiri hafa ekki áður komið á Evrópuleik á Anfield. 

 

TIL BAKA
Nýlegar fréttir
Fleiri fréttir
Fréttageymslan