Meiðslafréttir

Nú þegar landsleikjahlé er að baki er upplagt að kanna stöðuna á meiðslalistanum. Ef satt skal segja hefur listinn sá oft verið lengri. 

Alisson Becker tognaði aftan í læri í Tyrklandi gegn Galatasaray í lok september. Hann er á batavegi en er ekki orðinn leikfær. Hann gæti verið tilbúinn til leiks eftir tvær vikur eða svo. 

Ibrahima Konate kom ekki til Íslands með franska landsliðinu á dögunum og fór þess í stað heim til Liverpool. Eitthvað hefur verið að angra Frakkann frá því í síðasta deildarleik á móti Chelsea en reiknað er með að hann verði leikfær á morgun þegar Liverpool mætir Manchester United. Það er þó ekki alveg öruggt.

Ryan Gravenberch fór af velli í seinni leik Hollands í landsleikjahrotunni. Eftir því sem best er vitað var hann tekinn af velli meira til varúðar en hann væri meiddur. Hann á að vera til taks á morgun.

Wataru Endo fór ekki til móts við japanska landsliðið í landsleikjahléinu vegna meiðsla. Ekki er vitað hvort hann er ennþá meiddur. 

Aðrir leikmenn aðalliðs Liverpool eru klárir í bátana á móti Manchester United á Anfield Road á morgun. Víst er að Liverpool þarf á öllum sínum bestu mönnum að halda fyrir þann leik svo og næstu leiki.