Alexander Isak keyptur fyrir metfé!

Sögunni endalausu lauk þegar Newcastle United tók mettilboði Liverpool í sænska sóknarmanninn Alexander Isak. Hann er nú dýrasti leikmaður í sögu Liverpool og reyndar ensku knattspyrnunnar frá upphafi vega.

Liverpool bauð 110 milljónir sterlingspunda í Alexander Isak fyrr í sumar. Forráðamenn Newcastle höfnuðu tilboðinu. Seint í gærkvöldi spurðust út fréttir þess efnis að Liverpool hefði hækkað tilboðið um 15 milljónir. Newcastle tók tilboðinu. BBC og fleiri áreiðanlegir fjölmiðlar segja upphæðina geta hækkað upp í 130 milljónir ef ákvæði í samningnum virkjast á samningstímanum sem er sex ár. 

Með kaupunum sló Liverpool eigið kaupmet. Fyrr í sumar keypti Liverpool Þjóðverjann Florian Wirtz frá Bayer Leverkusen fyrir 100 milljónir punda. Sú upphæð hækkar um 16 og hálfa milljón að uppfylltum ákvæðum í kaupsamningnum. 

Upphæðin sem Liverpool borgar fyrir Alexander er gríðarlega há. Vonandi nær hann að finna sig hjá Liverpool og skila sínu. Við sjáum hvað setur og vonum það besta!