Er endalaus saga að byrja?

Oft á sumrin verða til endalausar sögur í sambandi við félagaskipti leikmanna. Ein svoleiðis saga, tengd Liverpool, virðist í uppsiglingu.

Sagan snýst um hvort Liverpool muni kaupa sænska landsliðsmanninn Alexander Isak frá Newcastle United. Liverpool hefur verið orðað við hann í allt sumar. Lengi var talið að Newcastle United myndi alls ekki selja Svíann og reyndar var líka talið að hann ætlaði sér alls ekki í burtu frá Newcastle. 

En svo kom annað hljóð í strokkinn. Alexander sýndi áhuga á að fara og líkur eru á að hann vilji helst fara til Liverpool. Hann varð eftir heima þegar Newcastle fór í æfingaferð til Asíu. Nú upp á síðkastið hefur hann æft með gamla liðinu sínu Real Sociedad á Spáni. Hann mun reyndar vera kominn aftur til Englands. 

Eins og fyrr segir var Alexander Isak orðaður við Liverpool fyrr í sumar. En eftir að Liverpool keypti Hugo Ekitike í síðasta mánuði var talið að Liverpool hefði keypt hann af því Alexander var ekki í boði. En nú virðist hann allt í einu vera í boði.

Nú um helgina mun Liverpool hafa boðið 120 milljónir sterlingspunda í Alexander. Forráðamenn Newcastle United höfnuðu tilboðinu. Sumir fjölmiðlar telja að hærra tilboði verði tekið af Newcastle. Hafa 20 milljónir í viðbót hafa verið nefndar sem upphæð sem myndi duga. 

Nú er að sjá hvað úr verður. Kannski er endalaus saga að byrja?