Ungliðar á braut

Í lok leiktíðar var staðfest að átta ungliðar muni yfirgefa Liverpool nú í sumar þegar samningar þeirra renna  út. Þrír af þeim spiluðu fyrir aðallið Liverpool og hafa það á afrekaskrá sinni alla tíð.

Þetta eru þeir Adam Lewis, Mateusz Musialowski, Melkamu Frauendorf, Luke Hewitson, Niall Osborne, Francis Gyimah, Nathan Giblin og Cody Pennington. Adam, Mateusz og Melkamu spiluðu með aðalliði Liverpool. 


Adam Lewis spilaði einn leik með aðalliði Liverpool. Hann er fæddur í Liverpool og fór alla leið í gegnum aldursflokka upp í aðalliðið.  Hann fór í lán til Amiens, Plymouth Argyle, Livingston og Newport County á maðan hann var hjá Liverpool. 


Pólverjinn Mateusz Musialowski kom til Liverpool sumarið 2020. Hann lék einn leik með aðalliði Liverpool. Sá leikur var núna á nýliðinni leiktíð. 


Melkamu Frauendorf lék tvívegis með aðalliði Liverpool. Hann kom frá Hoffenheim í júní 2020. Melkamu fæddist í  Eþíópíu en fluttist ungur með fjölskyldu sinni til Þýskalands. Hann hefur leikið með yngri landsliðum Þýskalands nú síðast með undir 19 ára liðinu. 

Liverpool klúbburinn á Íslandi þakkar þessum piltum fyrir framlag þeirra til félagsins. Um leið er þeim óskað góðs gengis.