Af kvennaliðinu

Keppni í efstu deild kvenna á Englandi er lokið. Liverpool náði mjög góðum árangri. Liðið endaði í fjórða sæti. Chelsea varð Englandsmeistari í fimmta sinn í röð og áttunda sinn alls. 

Liverpool fékk 41 stig í 22 leikjum. Arsenal var með 50 stig. Chelsea og Manchester City fengu 55 stig en markatala Chelsea var betri og liðið vann deildina á henni.

Síðustu fjórir leikir Liverpool fóru á þennan veg. Liverpool endaði apríl á að vinna Bristol City 0:1 á útivelli. Liverpool byrjaði maí frábærlega með því að vinna Chelsea 4:3 á heimavelli. Flestir áttu von á því eftir þessi úrslit að Chelsea myndi ekki vinna titilinn en annað kom á daginn.

Liverpool fylgdi þessum góða sigri eftir með öðrum góðum. Liðið lagði þá Manchester United að velli á Prenton Park. Jenna Clark skoraði eina mark leiksins. Með sigrinum var tryggt að Liverpool endaði fyrir ofan Manchester United sem hlaut fimmta sætið. Liverpool lauk svo leiktíðinni með stórgóðum 0:5 útisigri á Leicester City.

Vonandi verður árangur liðsins enn betri á næsta keppnistímabili. Vel má rökstyðja að flest sé til staðar að svo verði. 

Arsenal vann Deildarbikar kvenna og Manchester United FA bikarinn. Það yrði magnð ef Liverpool næði titli á næstu leiktíð.