Kemur heimsmeistari til Liverpool?

Einn miðjumaður hefur verið orðaður öðrum fremur við Liverpool allra síðustu vikurnar. Sá er heimsmeistari frá því í desember. Þetta er Alexis Mac Allister leikmaður Brighton and Hove Albion. Hann er bakatil fyrir miðju á myndinni hér að ofan ef rétt er séð.

Alexis hóf feril sinn með Argentinos Juniors 2016 og hann lék þar til 2019 en þá gekk hann í raðir Brighton. Hann vr í láni hjá argentínska liðinu á leiktíðinni 2019/20. Sumarið 2019 fór hann í lán til Boca Juniors. Alexis varð Argentínumeistari með Boca. Hann kom svo til Brighton fyrir fullt og fast í byrjun árs 2020. 

Alexis Mac Allister var valinn í landsliðshóp Argentínu fyrir HM í Katar. Hann stóð sig mjög vel á mótinu og skoraði eitt mark. Fram til þessa hefur hann leikið 19 landsleiki. 

Talið er nokkuð líklegt að Argentínumaðurinn vilji ganga til liðs við Liverpool. Í það minnsta er talið næsta víst að hann fari frá Brighton í sumar. 

Þrátt fyrir nafn sem vísar til Skotlands er Alexis Mac Allister fæddur og uppalinn í Argentínu. Hann á þó ættir að rekja til Skotlands og Írlands.