Stuðningsmenn Liverpool fá endurgreitt

Knattspyrnusamband Evrópu, UEFA, hefur tilkynnt að allir stuðningsmenn Liverpool, sem áttu miða á úrslitaleikinn í Meistaradeildinni í fyrra, fái endurgreitt. Alls áttu 19.618 stuðningsmenn Liverpool miða á leikinn. 

Mikill troðningur skapaðist fyrir utan Stade de France leikvanginn í París fyrir úrslitaleik Liverpool og Real Madrid og fyrir mikla mildi varð ekki manntjón. Segja má að endurgreiðslan sé táknræn viðurkenning frá Knattspyrnusambandi Evrópu á lélegu skipulagi sínu á framkvæmd leiksins.

Í síðasta mánuði var birt skýrsla sem leiddi í ljós að UEFA ber að mestu leyti ábyrgð á þeirri ringulreið og hættu sem skapaðist fyrir leikinn. UEFA hefur þegar beðist afsökunar og lofað að hrinda af stað áætlun til að svona endurtaki sig ekki. Upphaflega kenndi UEFA stuðningsmönnum Liverpool um það ástand sem skapaðist en rannsókn hefur  sannað að sökin sé þeirra sjálfra og ekki annarra.

Vinnubrögð UEFA hafa frá því strax eftir leik verið harðlega gagnrýnd af stuðningsmannasamtökum Liverpool. Það að UEFA skyldi hafa reynt að skella skuldinni á stuðningsmenn Liverpool er gersamlega óboðlegt og sýnir einfaldlega skítlegt eðli. Sem betur fer er ekki hægt að breyta sannleikanum eins og var hægt áður en snjallsímar og samfélagsmiðlar komu til sögunnar. 

Það hefur líka verið gagnrýnt hversu langur tími leið þar til UEFA viðurkenndi miðtök sín. Eins tók fleiri mánuði að rannsaka frekar einfalt mál og semja rannsóknarskýrslu. Skýrslan, þó alltof seint kæmi út, afhjúpaði og staðfesti óboðleg vinnubrögð UEFA!