Af ungliðum

Einn ungliði hefur yfirgefið Liverpool. Um er að ræða miðjumanninn Jake Cain. Hann er alinn upp hjá Liverpool og varð Unglingabikarmeistari með Liverpool 2019. Hann var í láni hjá Newport County á síðustu leiktíð. Hann er núna búinn að gera samning við Swindon Town sem spilar í fjórðu efstu deild. Jake lék einn leik með aðalliði Liverpool. Ekki hefur komið fram  hvort Liverpool fær einhverja peninga fyrir Jake. 

Max Woltman er kominn heim til Liverpool eftir að hafa verið í láni hjá Doncaster Rovers frá byrjun leiktíðar. Max, sem er framherji, er búinn að spila tvo leiki með aðalliði Liverpool. 


Annar ungliði er kominn heim úr láni frá meginlandi Evrópu. Billy  Koumetio var í sumar lánaður til Austria Wien. Hann er kominn aftur heim til Liverpool því hann spilaði lítið í Austurríki. Billy, sem er franskur miðvörður, hefur leikið einn leik með Liverpool. 

Ekki er ósennilegt að eitthvað meira verði um hreyfingar hjá ungliðum Liverpool þar til lokað verður fyrir félagaskipti. Sú er venjan.