Fjórir meiddir

Leiktíðin er rétt nýhafin og nú þegar eru fjórir leikmenn Liverpool komnir á meiðslalista sem var auður eða svo til þegar allt fór af stað. 


Fyrstan skal telja Roberto Firmino. Hann fór út af undir lok fyrri hálfleiks í leik Liverpool og Chelsea fyrir viku. Hermt er að hann hafi meiðst aftan í læri. Ekkert hefur verið gefið út um hversu lengi hann verður frá en í sumum fjölmiðlum var talað, í vikunni, um nokkra mánuði. 


Neco Williams fór ekki með landsliði Wales í þá leiki sem framundan eru. Ekki hefur komið fram hvers eðlis meiðsli hans eru og hversu lengi hann verður úr leik. 


Í dag var tilkynnt að Takumi Minamino væri á heimleið úr herbúðum Japan eftir að hafa meiðst. Meiðlsin munu ekki vera alvarleg en alla vega var Japaninn sendur heim til meðferðar.  


James Milner var ekki í liðshópi Liverpool í tveimur síðustu leikjum eftir að hafa leikið í fyrstu umferð á móti Norwich. Líklega ætti hann að vera orðinn leikfær eftir landsleikjahlé. 

Eftir ævintýralegt meiðslafargan á síðustu leiktíð er að vona að sama verði ekki uppi á teningnum á þessari sem nú er nýhafin. Þó liðshópur Liverpool sé mjög sterkur má hann ekki við miklum meiðslum!