Sami tekinn við Brighton

Sami Hyypia er kominn til Englands á nýjan leik. Hann var fyrr í sumar ráðinn framkvæmdastjóri Brighton and Hove Albion. Finninn magnaði hóf framkvæmdastjóraferil sinn í Þýskalandi þar sem hann stýrði Bayer Leverkusen frá 2012 til 2014. Hann var til að byrja framkvæmdastjóri Leverkusen með Sascha Lewandowski á meðan hann var að afla sér þjálfararéttinda en tók svo sjálfur við.
 
Bayer Leverkusen gekk ekki nógu vel þegar leið að lokum síðustu leiktíðar og Sami var látinn fara í apríl. Hann var svo ráðinn til Brighton í síðasta mánuði. Brighton leikur í næst efstu deild og hefur verið með betri liðum í deildinni síðustu árin. Sami var um tíma í þjálfaraliði finnska landsliðsins. 

Sami Hyypia var auðvitað goðsögn hjá Liverpool þar sem hann lék 464 leiki og skoraði 35 mörk á árunum 1999 til 2009. Sami var boðið að vera í þjálfaraliði Liverpool þegar hann hætti að spila með félaginu en hann ákvað að fara til Þýskalands þar sem hann spilaði með Bayer Leverkusen til 2011.