Þeir halda mér ungum!

Steven Gerrard segir að ungu mennirnir í Liverpool liðinu haldi honum ungum. Svo grínast fyrirliðinn með að ungliðarnir sjái um öll hlaupin fyrir hann. Kannski er þetta skýringin á því hversu sprækur Steven er ennþá og þó kominn á 16. leiktíð sína með Liverpool! Hann hafði þetta að segja eftir sigurinn magnaða á Old Trafford. 

,,Þeir sjá um öll hlaupin fyrir mig og vonandi halda þeir því sem lengst áfram! Ég held að lykillinn hjá þessu knattspyrnufélagi sé sá að vera alltaf með reynda topp leikmenn sem hafi þekkingu á að líta eftir ungum leikmönnum. Mér finnst að þeir Sterling, Allen, Henderson, Flanagan, til að nefna nokkra, hafi verið stórgóðir. Við eigum líka aðra unga leikmenn sem eru um það bil að fara að sýna hvað í þeim býr. Við erum með mjög góða blöndu af ungum og eldri mönnum."

,,Ég er núna sá elsti í hópnum. Þeir halda mér ungum og fá mig til að leggja hart að mér. Ég vona innilega að mér takist að leiða þá svo að við náum að eiga vel heppnað keppnistímabil."

Ungliðarnir sem Steven Gerrard nefnir hafa verið magnaðir á þessu keppnistímabili og það mætti nefna fleiri því ekki er nú Daniel Sturridge gamall. Það er ekki nokkur vafi á því að reynsla Steven Gerrard og leiðtogahæfileikar hans hafa gert þessum strákum gott og þeir hafa leikið enn betur fyrir vikið!