Luis fær mark í viðbót!

Luis Suarez fékk nú í vikunni eitt mark í viðbót í safn sitt. Markanefndin dæmdi honum mark sem til að byrja með var skráð sem sjálfsmark. Um er að ræða fjórða mark Liverpool á móti West Ham United um helgina.

Markinu var svo lýst í leikskýrslu hér á Liverpool.is. ,,Á 84. mínútu kom svo fjórða markið. Luis fór illa með einn mótherja við vítateiginn og skaut að marki. Heppnin var með honum því boltinn fór í Joey O´Brien í slá og inn."

Ekki skal kvartað yfir þessari ákvörðun en persónulega fannst mér þetta ekki vera neitt annað en sjálfsmark því boltinn hefði aldrei farið í markið nema af því hann breytti talsvert um stefnu af Joey O´Brien. Í þessu má nefna mark sem tekið var af Steven Gerrard á síðustu leiktíð en þá breytti skot hans örlítið um stefnu. En það er kannski með þessar nefndir eins og margar aðrar að þær eru ekki alltaf samkvæmar sér í úrskurðum. 

En Luis Suarez er þar með kominn með 15 deildarmörk og það er hið besta mál!