Spáð í spilin

Fyrir sex dögum voru leikmenn og stuðningsmenn Liverpool að sleikja sárin eftir hroðalega óvæntan skell fyrir Hull. Nú eru menn brattari eftir Suarez sýninguna á miðvikudagskvöldið. Luis gekk þá berserksgang og skoraði fernu þegar Liverpool vann 5:1 og hefði sigurinn getað verið enn stærri. West Ham United kemur í heimsókn til Liverpool á morgun og hugsanlega eru varnarmenn gestaliðsins ekkert spenntir fyrir því verkefni að reyna að hafa hemil á Luis Suarez.

Eitt er það að reyna að stoppa Úrúgvæjann sem virðist algjörlega óstöðvandi eftir að hann kom úr leikbanninu. Eitt er að reyna að skora og það ætti að geta tekist en mörk frá Hömrunum á Anfield eru líka skemmtilega sjaldgæf. Þeim tókst ekki að skora í síðustu heimsókn frekar en mörgum en héldu reyndar hreinu og fóru heim með eitt stig. Liverpool vann útileikinn 2:3 og hafði því betur samtals á síðustu leiktíð.

Flestum þykir líklegt að Liverpool vinni öruggan sigur og slakt gengi West Ham á ferðalögum sínum styrkir það álit. En eins og vel kom í ljós í Hull um síðustu helgi þá má aldrei slaka á því þá er voðinn vís. Leikmenn Liverpool voru sofandalegir frá upphafi leiksins og Tígrisdýrin unnu sinn fyrsta sigur á Liverpool í sögunni. Liverpool lék sér að Kanarífuglunum og sama viðhorf þarf á morgun því annars getur farið illa. 

Jólamánuðurinn verður annasamur hjá Liverpool. Margir leikir bíða og útileikirnir eru fyrirfram mjög erfiðir. Þess þá heldur þarf að vinna á morgun og halda áfram þaðan sem frá var horfið á miðvikudagskvöldið. Það er nokkuð í topplið Arsenal en sæti í Meistaradeild er takmark sem telst raunhæfara þótt það sé enginn ástæða til að hætta að gæla við Englandsmeistaratitilinn. 

Það hefur mikið verið rætt og ritað um Luis Suarez frá því hann skoraði fernuna mögnuðu og reyndar virðist þessi ótrúlegi leikmaður alltaf vera í fréttunum af góðu jafnt sem slæmu. En þrátt fyrir bresti sína þá fer ekki á milli mála að hæfileikar hans skipa honum í röð allra bestu knattspyrnumanna í heimi. Verði hann í treyju númer 7 á morgun er ekki annað hægt en að spá Liverpool öruggum sigri.

Ég ætla að gerast svo djarfur að spá því að Luis skori þrennu og Liverpool vinni 4:0. Reyndar yrði Luis að brjóta nokkurn ís til þess því honum hefur enn ekki tekist að skora á móti West Ham. Steven Gerrard er líklegur til að skora eitt en hann var nokkrum sinnum nærri því að skora á miðvikudagskvöldið. Það ætti líka að vera óhætt að spá mörkum frá Liverpool á Anfield því liðið hefur skorað 16 mörk í síðustu fjórum leikjum sínum í Musterinu. En Liverpool verður að vinna og ef maður þarf að vinna er aldeildis gott að hafa Luis Suarez í liðinu sínu. Sem betur fer verður hann eitthvað áfram hjá Liverpool!

YNWA