Þríleikurinn byrjaði illa

Liverpool fór illa út úr fyrsta hluta þríleiksins við Manchester City og tapaði 3:0. Kenny Dalglish segir að menn sínir verði að læra af þeim mistökum sem gerð voru. Hann hafði meðal annars þetta að segja eftir leikinn í Manchester.

,,Ég er nú ekki viss um að lokastaðan gefi rétta mynd af gangi leiksins. Ég ætla ekki að halda því fram að við höfum átt skilið að vinna en lærdómurinn í kvöld er sá að við förum illa út úr því ef við klárum ekki okkar færi."

,,Við getum sjálfir lagað margt sem fór úrskeiðis í kvöld og við þurfum að gera það. Þetta var hart en það verður enn harkalegra ef við drögum ekki lærdóm af."

Seinni hluti þríleiksins við Manchester City er auðvitað undanúrslitarimman í Deildarbikarnum. Liðin mætast fyrst miðvikudagskvöldið 11. janúar í Manchester og seinni leikurinn verður á Anfield Road 25. janúar. Í þessum leikjum ræðst hvort liðið fer á Wembley.

Liverpool og Manchester City skildu jöfn 1:1 á Anfield í fyrri deildarleiknum í leik sem Liverpool hefði átt að vinna en City hafði betur 3:0 á heimavelli sínum. Ljóst er að svipuð niðurstaða kemur Liverpool ekki á Wembley og því verða leikmenn að draga lærdóm af tapinu í Manchester eins og Kenny Dalglish bendir á.