Njósnarinn Peter Crouch

Peter Crouch heimsótti Nou Camp á dögunum, fór í skoðunarferð um leikvanginn og horfði svo á leik Barcelona og Getafe.

Crouch telur sig hafa lært ýmislegt um leikstíl Börsunga eftir að hafa séð þá spila með eigin augum.

,,Stjórinn gaf okkur frí í nokkra daga um daginn, ég og konan ákváðum þá að skella okkur til Barcelona," sagði Crouch.

,,Við fórum í skoðunarferð um völlinn og þetta er tilkomumikill staður.  Í raun er þetta gríðarstórt og maður fær það á tilfinninguna að á Evrópukvöldi gæti maður látið þetta stíga sér til höfuðs."

,,Ég hef aldrei spilað þarna og ég hafði aldrei komið á leikvanginn eða til borgarinnar almennt sem ferðamaður.  Við ákváðum því að fara til Barcelona í tilefni af þessum stórleik til að fá tilfinningu fyrir vellinum.  Við fórum á leik Barcelona og Getafe í miðri viku, þetta var gott tækifæri til að sjá þá í nærmynd.  Maður getur ekki séð hreyfingar án bolta í sjónvarpinu þannig að ég náði að læra þónokkuð um þá."