Shay Given ekki með á morgun

Aðalmarkvörður Newcastle, Shay Given, verður ekki með liðinu á Anfield á morgun.  Hann varð fyrir meiðslum í leik gegn West Ham um helgina og þurfti að fara í uppskurð vegna meiðslanna.

Írinn lenti í samstuði við hinn stóra og stæðilega sóknarmann West Ham, Marlon Harewood og lá óvígur eftir.  Það kom svo í ljós að hann þurfti að fara í uppskurð á maga til að fá bót meina sinna.

Fjarvera hans verður að teljast þónokkur missir fyrir Newcastle og vonandi ná leikmenn Liverpool að koma boltanum framhjá Steve Harper sem verður á milli stanganna hjá Newcastle í fjarveru Given.