Góður sigur en dýrkeyptur

Liverpool unnu í dag sinn ellefta leik í röð í öllum keppnum.  Sigurinn var hinsvegar dýrkeyptur því ekki er víst að Xabi Alonso geti tekið þátt í úrslitaleik FA bikarsins á laugardaginn.  Spánverjinn sneri sig á ökkla í fyrri hálfleik og var borinn útaf.

Alonso fer í skoðun á Melwood á morgun og þá verður vitað nánar hvort að hann verði klár í leikinn.  Honum finnst hinsvegar sjálfum að meiðslin séu ekki það alvarleg og að hann verði búinn að ná sér í tíma.

Rafael Benitez hafði þetta að segja eftir leikinn:  ,,Xabi telur að hann verði klár fyrir úrslitaleikinn en við verðum að bíða og sjá hvað kemur út úr skoðuninni á morgun."

,,Það mikilvægasta í dag var að við héldum áfram að vinna.  Við hljótum að vera ánægðir með árangur liðsins á þessu tímabili en við vitum að við þurfum að bæta okkur á  næsta ári ef við ætlum að vinna titilinn."

,,Að ná 82 stigum er frábært og við erum mun nær Chelsea.  Við teljum okkur geta gert meira á næsta tímabili og við höfum meira sjálfstraust."