Er Alisson Becker á förum?

Síðustu daga hefur verið tæpt á því í nokkrum fjölmiðlum að Alisson Becker markmaður Liverpool sé jafnvel að hugsa sér til hreyfings. Segja verður eins og er að þessar fréttir koma á óvart. 

Eitt félag hefur verið nefnt til sögunnar í þessu efni. Um er að ræða Juventus á Ítalíu. Ekki er gott að segja hvort eitthvað er til í þessu en Alisson er auðvitað öllu vanur á Ítalíu eftir að hann spilaði þar með Roma.  

Það er af brasilíska landsliðsmarkmanninum að frétta að hann er ekki búinn að spila síðustu vikur vegna meiðsla. Það er þó farið að styttast í endurkomu. Hugsanlegt er að hann verði leikfær um næstu helgi þegar Liverpool leikur við Manchester United.