Spáð í spilin

Í tilefni þess að ný leiktíð er að hefjast spáum við í spilin hér á Liverpool.is. Fyrsti leikur leiktíðarinnar fer fram á Anfield Road núna í kvöld.

Liverpool er ríkjandi Englandsmeistari og hefur titil að verja. Vörnin verður ekki auðveld en ef vel tekst til ætti liðið að geta varið titil sinn. Það hafa orðið breytingar á liðinu. Lykilmenn frá síðustu árum hafa farið og aðrir komið í þeirra stað. Það á örugglega eftir að taka tíma fyrir þá að fóta sig. Aldrei áður hefur meistaralið Liverpool tekið meiri breytingum fyrir nýja leiktíð. 

Liverpool hefur heldur ekki áður þurft að syrgja liðsfélaga í aðdraganda leiktíðar. Diogo heitinn Jota á eftir að skilja stórt skarð eftir sig. Hann var frábær knattspyrnumaður en ekki síður mikilvægur liðsmaður á margan hátt. Liðsfélagar hans syrgja samherja en ekki síður vin. Það er ekki hægt að gera sér í hugarlund hvernig það hefur verið fyrir vini hans að komast í gegnum undirbúningstímabilið svo til með tárin í augunum. En það er víst ekki annað í boði en að halda leik áfram. 

Englandsmeistarar Liverpool fá Bournemouth í heimsókn í kvöld. Mótherjarnir eru ekki auðveldir. Kirsuberjapiltarnir eru mjög góðir og höfnuðu í efri hluta deildarinnar á síðasta keppnistímabili. Síðan hafa þeir misst góða liðsmenn og meðal annars Milos Kerkez til Liverpool. Reyndar hefur Bournemouth misst góða menn reglulega á síðustu árum en samt staðið sig með sóma í deildinni. 

Ég spái því að leikmenn Liverpool byrji vörn Englandsmeistaratitilsins með sigri. Liverpool er með betra lið en Bournemouth og á að vinna ef liðið spilar vel. Liverpool vinnur 3:1!

YNWA!