Dregið í FA bikarnum

Búið er að draga til næstu umferðar í FA bikarnum. Liverpool fær útileik á móti Plymouth Argyle. Plymouth komst áfram í fjórðu umferð í gær með því að vinna frækinn 0:1 sigur á Brentford. Sigurinn kom mjög á óvart svo ekki sé meira sagt.  

Sigurinn í gær er, hingað til, hápunktur Plymouth á leiktíðinni. Liðinu hefur gengið illa og er neðst í næst efstu deild sem stendur. Liverpool á að eiga alla möguleika á að komast áfram en Plymouth er á heimavelli og allt getur gerst í bikarkeppnum.

Guðlaugur Victor Pálsson er í röðum Plymouth og það verður sannarlega gaman fyrir hann að spila á móti sínu gamla liði. Eins og allir vita var hann í röðum Liverpool. Guðlaugur var á mála hjá Liverpool frá 2008 til 2011. Hann spilaði á móti Brentford í gær og átti góðan leik.