Verðum að skrifa okkar eigin sögu!

Alisson Becker, markmaður Liverpool, segir að núverandi leikmenn Liverpool verði að skrifa sína eigin sögu. Nýr kafli í sögu Liverpool byrjaði í sumar þegar Arne Slot tók við af Jürgen Klopp sem framkvæmdastjóri félagsins. 

,,Ég er mjög ánægður því leikmannahópurinn hérna er nógu góður til að vinna merkileg afrek. Mikilvægast er að sú staðfesta sem þarf til að vinna titla býr í þessum hópi. Við eigum ekki að þurfa að bera okkur saman við lið úr fortíðinni. Við verðum að skrifa okkar eigin sögu á keppnistímabilinu."

Þegar Jürgen Klopp tók við Liverpool haustið 2015 talaði hann á svipuðum nótum. Hann sagði að leikmenn Liverpool yrðu að skrifa sína eigin sögu svo þeir væru ekki látlaust bornir saman við leikmenn sem hefðu unnið afrek fyrr á árum. Þetta gekk eftir hjá Jürgen. Þó svo að leikmannahópur Liverpool hafi breyst lítið frá því Arne tók við er ekki vafi á því að nýr kafli hófst í sögu Liverpool þegar hann tók við. 

Liverpool stendur sannarlega vel að vígi nú þegar árið 2024 er að renna sitt skeið. Vissulega er mikið eftir af leiktíðinni og allt getur gerst. En það er ekki annað hægt en að gleðjast þegar Liverpool er í efsta sæti deildarinnar bæði á jólum og við áramót!